Get Adobe Flash player

ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ

ጥቅምት 16 ቀን 2009 ዓ.ም. በስመ አብ ወወልድ ለመንፈስ ቅዱስ አሐዱ አምላክ አሜን የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ጉባኤ፣...

35ኛው አጠቃላይ የሰበካ መንፈሳዊ መደበኛ ስብሰባ ከጥቅምት 7-10 ቀን 2009 ዓ.ም ሲካሄድ የቆየው ተጠቃቀ፡፡

በመምህር ዕንቈባሕርይ ተከስተ ዘመናትን በዘመናት የሚተካ እግዚአብሔር አምላክ 2008 ዓ.ም ዘመነ ዮሐንስን አሳልፎ ለ2009 ዓ.ም ዘመነ ማቴዎስ አደርሶናል፡...

ብፁዕ ወቅዱስ አቡነ ማትያስ ፓትርያርክ ርእሰ ዓውደ ዓመትን ምክንያት በማድረግ በመላ ሃገሪቱ ጸሎት እንዲደረግ ለሁለተኛ ጊዜ መመሪያ አስተላለፉ፤

በመምህር ሙሴ ኃይሉ በቤተ ክርስቲያናችን ትውፊት ተጠብቆ የቆየውን እና በየዓመቱ የሚከናወነውን የእንኳን አደረስዎ መርሐ ግብር የዘንድሮ ዘመን መለወጫ በዓለ ...

ቃለ በረከት ዘእምኀበ ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ዘተናገረ በበዓለ ርእሰ ዐውደ ዓመት ዘዕሥራ ምእት ወተስዓቱ ዓመተ ምሕረት፡፡

በስመ አብ ወወልድ ወመንፈስ ቅዱስ አሐዱ አምላክ አሜን ፡፡ በሀገራችን በኢትዮጵያ በገጠርና በከተማ የምትኖሩ፣ ከሀገር ውጭ በተለያዩ አህጉር የምትገኙ፤ ...

ብፁዕ ወቅዱስ አቡነ ማትያስ ፓትርያርክ የደብረ ሊባኖስ ገዳምን ጐበኙ፡፡

በገዳሙ የተሠሩ የተለያዩ የልማት ሥራዎችን መርቀዋል፡፡ በመምህር ሙሴ ኃይሉ ብፁዕ ወቅዱስ አቡነ ማትያስ ቀዳማዊ ፓትርያርክ፣ ርእሰ ሊቃነ ጰጳሳ...

  • ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ

    Thursday, 27 October 2016 06:16
  • 35ኛው አጠቃላይ የሰበካ መንፈሳዊ መደበኛ ስብሰባ ከጥቅምት 7-10 ቀን 2009 ዓ.ም ሲካሄድ የቆየው ተጠቃቀ፡፡

    Tuesday, 25 October 2016 06:40
  • ብፁዕ ወቅዱስ አቡነ ማትያስ ፓትርያርክ ርእሰ ዓውደ ዓመትን ምክንያት በማድረግ በመላ ሃገሪቱ ጸሎት እንዲደረግ ለሁለተኛ ጊዜ መመሪያ አስተላለፉ፤

    Thursday, 15 September 2016 11:54
  • ቃለ በረከት ዘእምኀበ ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ዘተናገረ በበዓለ ርእሰ ዐውደ ዓመት ዘዕሥራ ምእት ወተስዓቱ ዓመተ ምሕረት፡፡

    Thursday, 15 September 2016 11:50
  • ብፁዕ ወቅዱስ አቡነ ማትያስ ፓትርያርክ የደብረ ሊባኖስ ገዳምን ጐበኙ፡፡

    Wednesday, 07 September 2016 09:51

በደቡብ ሱዳን በጁባ ከተማ የኢትዮጵያ ኦርቶዶክስ ደብረ ምህረት ቅዱሰ ሚካኤል ቤተ ክርሰቲያን ቅዳሴ ቤቱ ተከበረ

በዶ/ር አባ ኃ/ማርያም መለሰ
የጠቅላይ ቤተ ክህነት ም/ሥራ አስኪያጅ

የክርስትና እምነት በኢትዮጵያ የተሰበከው በመጀመሪያው ምዕት ዓመት ነው፡፡ ይሁን እንጂ የኢትዮጵያ ኦርቶዶክስ ተዋሕዶ ቤተ ክርስቲያን መስፋፋት የጀመረውና ወንጌልም በመላዋ ኢትዮጵያ የተሰበከው በ4ኛው መቶ ዓመት በአባ ሰላማ ከሣቴ ብርሃን ዘመነ ጵጵስና ነው፡፡ ይህች ጥንታዊት ቤተ ክርስቲያን እምነቷን፣ ሥርዓቷንና ትምህርቷን በተለያዩ ጊዜያት ለዓለም ስታስተዋውቅ ቆይታለች፡፡ አሁንም በተለያዩ የአፍሪካ፣ የአውሮፓና የጃማይካ ክፍለ ዓለማት በተለያየ መንገድ እምነቷን እያስፋፋች ትገኛለች፡፡ በቅርቡ በጎረቤት አገር በደቡብ ሲዳን በጁባ ከተማ የቅዱስ ሚካኤል ቤተ ክርቲያን ተሠርቶ ቅዳሴ ቤቱን እንድናከብር በብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለሃይማኖት አባታዊ መመሪያ በ13/3/2007 ዓ.ም ወደ ቦታው ተጉዘን ጽላተ ሕጉን ይዘን እንድንሄድ የታዘዝነው፡-

  • ብፁዕ አቡነ አረጋዊ ሊቀ ጳጳስ የመንበረ ጸባዖት ቅድስት ሥላሴ ካቴድራል የበላይ ኃላፊና

  • አባ ኃ/ማርያም መለሰ /ዶ/ር የጠቅላይ ቤተ ክህነት ም/ሥራ አስኪያጅ ስንሆን በ13/3/2007 ዓ.ም በ7፡30 ሰዓት ጁባ አየር ማረፊያ በደረስን ጊዜ አምባሳደር ፍሬ ተስፋሚካኤልና ምእመናን የአቀባበል ስነ ሥርዓት ተደርጐ ወደ ታነፀው ቤተ ክርስቲያን ጉዞ ተጀምሮ በግምት 1 ኪሎ ሜትር ሲቀረው ጽላቱን በመሸከም የእግር ጉዞ በማድረግ ወደ ቦታው እንደደረሰን በቤተ ክርክርስቲያኑ ሥርዓተ ጸሎት በማድረስና ትምህርተ ወንጌል በመስጠት የዕለቱን ፕሮግራም አጠናቀናል፡፡ በ14/3/2007 ዓ.ም ሥርዓተ ቅዳሴውን ካከናወን በኋላ ዑደት በማድረግ በዓለ ንግሡን አክብረናል፡፡ የቤተ ክርስቲያኑ አሠራር የሚደነቅ ሲሆን በዛው ቦታ የካቴድራል ያህል የሚቆጠር ቤተ ክርስቲያን መሠራቱ ከ200-500 የሚቆጠሩ ምእመናን አቅም መሠራቱ እንዲሁም የሚደንቀው ደግሞ በ6 ወር ሠርተው ማጠናቀቃቸው ነው አስደናቂ የሚሆነው፡፡

  • IMG_0796 IMG_0811 IMG_0829 IMG_0843 IMG_0844 IMG_0858 IMG_0988
  • በዕለቱ በተከናወነው ስነ ሥርዓት በኢፌድሪ የደቡብ ሱዳን አምባሳደር የደቡብ ሪፐብሊክ ሱዳን የፕሬዚዳንቱ አማካሪ የደቡብ ሱዳን የፀጥታና የፍትህ ጄኔራል፣ የኤርትራ ቤተ ክርቲያን ተወካይና አገልጋይ ካህናት እንዲሁም ምዕመናን የግብፅ ቤተ ክርስቲያን ተወካይ የደቡብ ሱዳን የካቶሊክ ቤተ ክርስቲያን ተወካይ እና የደቡብ ሱዳን የጎሳ መሪዎች ተወካይ በበዓሉ የተገኙ ሲሆን አምባሳደር ፍሬ ተስፋሚካኤልና የደቡብ ሪፐብሊክ የፕሬዝዳንቱ ኣማካሪ በየተራ ንግግር አድርገዋል፡፡ በንግግራቸውም ቤተ ክርስቲያኗ የአፍሪካውያን እናት ቤተ ክርስቲያን እንደሆነችና የብሉይ ኪዳን የክርስትናው የነፃነት፣ የታሪክ መሠረት መሆኗን በሚያስደንቅ አገላለጽ አብራርተዋል፡፡ ለወደፊቱም ብዙ የአፍሪካ ሀገሮችን መድረስ እንደሚገባት ገልጸዋል፡፡ ሌላው ለሌላው አርአያ የሚሆን የኢትዮጵያውያንና የኤርትራውያን ምዕመናን በአገልግሎት የሚያዩት መረዳዳትና መደጋገፍ ነው፡፡ በኢትዮጵያ ኦርቶዶክስ በኩል የደብረ ሳህል ቅዱሰ ሚካኤል ቤተ ክርቲያን በዓል ሲሆን፣ የኤርትራ ካህናትና ምዕመናን አገልግሎት በአንድ ላይ ያከናውናሉ፡፡ የቅድስት ማርያም ቤተ ክርቲያን የኤርትራ ስትሆን በበዓሉ ቀን የኢትዮጵያ ካህናትና ምዕመናን በአንድነት አገልግሎት ይሰጣሉ፡፡ እንዲሁም ቤተ ክርቲያኑ ተጀምሮ እስኪጠናቀቅ ድረስ ያሳዩት ተሳትፎ የሕዝብ ለሕዝብ ግንኙነቱን የሚያጠናክር በመሆኑ እጅግ የሚደነቅ ነው፡፡ ለበዓሉ ታዳሚ የቅዱሰነታቸውን የመልዕክት ደብዳቤ ለተሰበሰበው ምዕመናን አንብበን የእንኳን ደስ አላችሁ የአባታዊ ቡራኬአቸውን አብስረናል፡፡

  • በ15/3/2007 ዓ.ም በደቡብ ሱዳን የኢትዮጵያ ፌዴራላዊ ሪፐብሊክ አምባሳደር ጽ/ቤት በመሄድ ከኢምባሲው ሠራተኞች ጋር በመወያየት ለቤተ ክርስቲያኗ ድጋፍ እንዲያደርግ ሌሎችም የልማት ሥራዎች በሚሠሩበት ጊዜ ድጋፋቸው እንዳይለያቸው ተወያይተን የኢምባሲው ሠራተኞችም በደስታ እንደሚመለከቱት እገዛም እንደሚያደርጉ ቃል ገብተዋል፡፡ ሰበካ ጉባኤውም ለወደፊቱ የልማት ሥራዎችን ለመሥራት የገዙትን መሬት በቦታው ተገኝተን ለማየት ችለናል፡፡ ቦታውም ሰፊና ብዙ ሊያሠራ የሚችል መሆኑን ተገንዝበናል፡፡ ቦታው ሥራውን የሚጀምረው ብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት የመሠረት ድንጋይ ካስቀመጡ በኋላ የሚጀመር መሆኑንም ለማወቅ ችለናል፡፡ ከቦታው ሀገረ ገዥ ጋር ባደረግነው ውይይት የኢትዮጵያ ኦርቶዶክስ ቤተ ክርስቲያን መሠረታችን በመሆኗ ማንኛውንም እገዛ ለማድረግ ዝግጁ መሆናቸውን ገልጸውልናል፡፡

  • በመጨረሻም ከግብፃውያን ጳጳሳት ጋር በአጭር ጊዜ ውይይት በማድረግ በቀጣዩ ጊዜ ወንጌል የሚስፋፋበትን ሁኔታ እንዴት ማድረግ እንዳለብን ተነጋግረናል፡፡ የሚገርመው ቤተ ክርስቲያናችን በውጩ ያላት ግርማና ክብር የተለየ ነው፡፡ ተግተን መሥራት እንዳለብን ትልቅ ቁጭትን ፈጥሮብናል፣ ቤተ ክርስቲያኗ ዓለም አቀፋዊ ተልዕኮዋን ማጠናከርና ማስፋፋት እንደሚኖርባትም በዚሁ አጋጣሚ እንገልጻለን፡፡

ይህን ሁሉ ላደረገ ለልዑል እግዚአብሔር ምስጋና ይድረሰው

ዶ/ር አባ ኃ/ማርያም መለሰ
የጠቅላይ ቤተ ክህነት ም/ሥራ አስኪያጅ

ብፁዕ ወቅዱስ ፓትርያርኩ በጋሞጎፋና በደቡብ ኦሞ አህጉረ ስብከት ሐዋርያዊ ጉዞ አደረጉ፡፡

  • ሁለት አዳዲስ አብያተ ክርስቲያናት ተባርከው ቅዳሴ ቤታቸው ተከብሯል፡፡

  • ከአንድ ሺህ ሦስት መቶ ሐምሳ ሰዎች በላይ ተጠምቀው የቤተ ክርስቲያን አባላት ሆነዋል፡፡

ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት የጋሞ ጎፋና ደቡብ ኦሞ አህጉረ ስብከት ሊቀ ጳጳስ ከሆኑት ከብፁዕ አቡነ ኤልያስ በተደረገላቸው ግብዣ መሠረት ከጥቅምት 27 ቀን 2007 ዓ.ም. ጀምሮ እስከ ኅዳር 2 ቀን 2007 ዓ.ም. ድረስ በሁለቱም አህጉረ ስብከት ሐዋርያዊ አገልግሎት አበርክተዋል፡፡

ቅዱስ ፓትርያርኩ ከብፁዓን አበው ሊቃነ ጳጳሳት ጋር በአርባ ምንጭ ከተማ ሲደርሱ የሀገረ ስብከቱ ሊቀ ጳጳስና የሥራ ኃላፊዎች፣ የከተማው ከፍተኛ የመንግሥት ኃላፊዎች፣ ሊቃውንተ ቤተ ክርስቲያን፣ ካህናትና በብዙ ሺህ የሚቆጠሩ ምእመናን በተገኙበት ደማቅ አቀባበል የተደረገ ሲሆን በዕለቱም በአርባ ምንጭ ከተማ አዲስ ተሠርቶ ለምርቃት የተዘጋጀው የደብረ ፀሐይ ቅዱስ ጊዮርጊስ ቤተ ክርስቲያን ቀኖና ቤተ ክርስቲያን በሚፈቅደው መልኩ ሥርዓተ ቡራኬው ተፈጽሞ በዕለቱ ይህን ታላቅ በዓል ለማክበር ለተሰበሰበው ሕዝበ ክርስቲያን በብፁዕ አቡነ ቀውስጦስ ሰፊ ትምህርተ ወንጌል ከተሰጠ በኋላ በብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት ትምህርት፣ ቃለ ምዕዳንና ቡራኬ በመስጠት የዕለቱ ሥርዓት ተጠናቅቋል፡፡ በነጋታውም የቤተ ክርስቲያኑን ቅዳሴ ቤት በቅዱስ ፓትርያርኩ መሪነት ከተከበረ በኋላ ሰፊ የዓውደ ምሕረት የስብከተ ወንጌል አገልግሎት ተካሒዶ ሕዝቡ በቅዱስ ፓትርያርኩ ተባርከዋል፡፡

 ክፍል 1   

 ክፍል 2

 

የቅዱስ ጊዮርጊስ ቤተ ክርስቲያን ቅዳሴ ቤት እንደተከበረ ጉዞ ወደ ደቡብ ኦሞ ሀገረ ስብከት ጅንካ ከተማ ተደርጎ በዚያም ተመሳሳይ የክብር አቀባበል ተደርጓል፡፡ የዞኑ አስተዳዳሪን ጨምሮ ከፍተኛ የመንግሥት ኃላፊዎች የመንገድ ግማሽ መጥተው ቅዱስ ፓትርያርኩንና ብፁዓን ሊቃነ ጳጳሳትን ተቀብለዋል፡፡ የሀገረ ስብከቱ ኃላፊዎች፣ የገዳማትና አድባራት አስተዳዳሪዎች፣ ካህናትና ምእመናን በታላቅ መንፈሳዊ ደስታ በከፍተኛ የአቀባበል ዘይቤ ተቀብለዋቸዋል፡፡ በከተማው ሕዝብ ከፍተኛ አስተዋጽኦ አድራጊነት የተገነባው አዲስ የደብረ ቀራንዮ መድኃኔ ዓለም ቤተ ክርስቲያንም ቀኖና ቤተ ክርስቲያን በሚፈቅደው መልኩ በጸሎት ተባርኮ ይህንን በዓል ለማክበር ለተሰበሰበው ሕዝበ ክርስቲያንም ሰፊ ትምህርተ ወንጌል በብፁዓን አበው፣ ቃለ ምዕዳንና ቡራኬ በቅዱስ ፓትርያርኩ ተሰጥቷል፡፡

ቅዳሴ ቤቱን ለማክበር ቅዱስ ፓትርያርኩ ከሌሊቱ ዘጠኝ ሰዓት በቤተ ክርስቲያኑ በተገኙበት ጊዜ በሀገረ ስብከቱ ሊቃውንተ ቤተ ክርስቲያን አስተማሪነት ትምህርተ ሃይማኖት ተምረው ወደ ክርስትና የተመለሱ አንድ ሺህ ሦስት መቶ ሃምሳ ሰዎች ለመጠመቅ የቀረቡ ሲሆን ሥርዓተ ጸሎቱ በቅዱስ ፓትርያርኩ መሪነት ተፈጽሞ በቅዱስ አባታችንና በብፁዓን አበው ሊቃነ ጳጳሳት መሪነት ሁሉም ሰዎች ተጠምቀው የቤተ ክርስቲያናችን አባላት ሆነዋል፡፡

የደብረ ቀራንዮ መድኃኔ ዓለም ቤተ ክርስቲያን ቅዳሴ ቤት ከተከበረ በኋላ በቅዱስ አባታችንና በብፁዓን አበው ሊቃነ ጳጳሳት ትምህርት፣ ቃለ ምእዳንና ቡራኬ ተሰጥቶ የበዓሉ ፍጻሜ ሆኗል፡፡

 ታቦተ ጽዮንን አስመልክቶ የተናፈሰው ወሬ ሐሰት መሆኑን የቅዱስ ፓትርያርክ ልዩ ጽ/ቤት መግለጫ ሰጠ

ታቦተ ጽዮንን አስመልክቶ በቅዱስ ፓትርያርኩ መግለጫ እንደተሰጠበት አስመስሎ በሰሞኑ ሲናፈስ የነበረው ወሬ ፍጹም የፈጠራ ወሬና አሉባልታ መሆኑን የብፁዕ ወቅዱስ ፓትርያርክ ልዩ ጽ/ቤት ዛሬ ህዳር 6 ቀን 2007 ዓ.ም በወጣው መግለጫ አስታወቀ፡፡ የሐሰት ወሬው ምንጭ ዘመኑ በወለደው ኢንተርኔት አማካኝነት የተናፈሰ ሲሆን ጽሑፉ ሙሉ በሙሉ ሐሰትና እርስበርስ የሚጋጭ አንድም እውነታ የሌለው ከመሆኑም በላይ የቤተ ክርስቲያንንና የሀገርን ሰላም ለማወክ ሆን ተብሎ የተቀነባበረ ሴራ መሆኑን መግለጫው አስታውቆአል፡፡ በተጨማሪም ይህንን የፈጠራ ሐሰተኛ ወሬ ወደ ጎን በመተው ምዕመኑ የተለመደውን ታሪካዊ የኅዳር ጽዮን በዓል በቅድስት ከተማ በአክሱም ጽዮን በመገኘት እንዲያከብሩም ጥሪውን አስተላልፎአል፡፡ የተከበራችሁ አንባቢዎች ከቅዱስ ፓትርያርክ ልዩ ጽ/ቤት የተሰጠውን ሙሉ መግለጫ እንደሚከተለው አቅርበናል፡፡ መልካም ንባብ፡፡ 

ታቦተ ጽዮንን አስመልክቶ የተናፈሰው ወሬ ሐሰት መሆኑን የቅዱስ ፓትርያርክ ልዩ ጽ/ቤት ያወጣው መግለጫ

ጥቅምት 26 ቀን 2007 ዓ.ም.
በስመ አብ ወወልድ ወመንፈስ ቅዱስ አሐዱ አምላክ አሜን
ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ መደበኛ ስብሰባ፤ በዓመት ሁለት ጊዜያት እንዲሆን በፍትሕ መንፈሳዊ አንቀጽ 5 ንዑስ አንቀጽ 164 በተደነገገው መሠረት የቅዱስ ሲኖዶስ ምልዓተ ጉባኤ የዘንድሮውን መደበኛ ስብሰባ ከጥቅምት 12 ቀን 2007 ዓ.ም. ጀምሮ ሲያካሒድ ሰንብቷል፡፡

በዚሁ መሠረት የመክፈቻው ሥርዓተ ጸሎት ከተፈጸመበት ከበዐሉ ዋዜማ ከጥቅምት 11 ቀን 2007 ዓ.ም. ጀምሮ እስከ ጥቅምት 26 ቀን 2007 ዓ.ም ድረስ ለ15 ቀናት ያህል ባደረገው ጉባኤ ጠቀሜታ ባላቸው የአጀንዳ ነጥቦች ተወያይቶ ውሳኔዎችን አሳልፎአል ፡፡ ከተላለፉት በርካታ ውሳኔዎች መካከልም ዋና ዋናዎቹ የሚከተሉት ናቸው ፡፡

1. የጥቅምቱ 2007 ዓ.ም. የቅዱስ ሲኖዶስ ምልአተ ጉባኤ በቅዱስ ፓትርያርክ የመግቢያ ንግግር ከተከፈተ በኋላ ሠላሳ ሦስተኛው አጠቃላይ ሰበካ መንፈሳዊ ጉባኤ ያቀረበው የጋራ መግለጫ የ2007 የበጀት ዓመት የሥራ መመሪያ ሆኖ እንዲሠራበት ወስኗል ፡፡

2. በቅዱስ ሲኖዶስ የተሠየመው አርቃቂ ኮሚቴ ያቀረበው ረቂቅ ሕገ ቤተ ክርስቲያን፤ ለምልዓተ ጉባኤ ቀርቦ ገጽ በገጽ ከተነበበና እርማት ከተደረገ በኋላ ይኸው ሕግ እንዲሠራበት የቅዱስ ሲኖዶስ ምልዓተ ጉባኤ በሙሉ ድምፅ ተስማምቶ አጽድቋል ፡፡

3. የግንባታው ሥራ እየተካሔደ ለሚገኘው ለታላቁ የዓባይ ሕዳሴ ግድብ ማከናወኛ አገልግሎት ይውል ዘንድ የኢትዮጵያ ኦርቶዶክስ ተዋሕዶ ቤተ ክርስቲያን ቀደም ሲል ከሃያ ሦስት ሚሊየን ብር በላይ ገቢ ማድረጓ የሚታወስ ነው፤ አሁንም ለሁለተኛ ጊዜ ከጠቅላይ ቤተ ክህነትና ከየአህጉረ ስብከቱ ጽ/ቤቶች የተገኘውን በድምሩ ብር 16,403,091.01 (ዐሥራ ስድስት ሚሊዮን ዐራት መቶ ሦስት ሺህ ዘጠና አንድ ብር ከዜሮ አንድ ሳንቲም) ገቢ ያደረግን ስለሆነ ይኸው ታውቆ የሕዳሴው ግድብ ለሀገራችን የዕድገት ታሪክ ምዕራፍ ከፋች ይሆናል ተብሎ ስለታመነበት ሁሉም ኅብረተሰብ ጠቀሜታውን ከወዲሁ በበለጠ በመረዳት አስፈላጊውን ሁሉ በመፈጸምና በማስፈጸም እንዲረባረብ በዚህ አጋጣሚ የቅዱስ ሲኖዶስ ጉባኤ ጥሪውን ያስተላልፋል፡፡

4. በአሁኑ ጊዜ በዓለማችን በተለይም በምዕራብ አፍሪካ ዙሪያ እየቀሰፈ የሚታየው ‹‹ኢቮላ›› በመባል የሚታወቀው አዲስ ቀሳፊ በሽታ ወደ ሀገራችን ኢትዮጵያ እንዳይገባና ከዓለም ዙሪያ እንዲጠፋ ከወዲሁ መከላከል አስፈላጊ በመሆኑ ኅብረተሰቡ በመከላከሉ ረገድ ብርቱ ጥንቃቄ ያደርግ ዘንድ በመገናኛ ብዙኃን ሲነገር ይደመጣል፤ የኢትዮጵያ ኦርቶዶክስ ተዋሕዶ ቤተ ክርስቲያንም የኅብረተሰቡ አገልጋይ ከመሆኗ አንፃር የበኩሏን ድርሻ ልትወጣ የሚገባት ስለሆነ፤ በየአህጉረ ስብከቱ በየአንዳንዱ አጥቢያ ቤተ ክርስቲያን ጸሎተ ምህላ ይደረግ ዘንድ ቅዱስ ሲኖዶስ መመሪያን ሰጥቷል፡፡

5. በጀትን በተመለከተ የቅዱስ ሲኖዶስ ምልአተ ጉባኤ ለ2007 ዓ.ም. ተጠንቶ የቀረበውን በጀት አጽድቋል ፡፡

6. የሰዎች ሕገ ወጥ ዝውውር የሀገርን ክብር የሚፈታተን ተተኪ ትውልድን የሚያሳጣ ድርጊት በመሆኑ ይህን ሕገ ወጥ አሠራር ሁሉም ኢትዮጵያዊ ትኩረት ሊሰጥበት እንደሚገባ እየተነገረ ነው፤ ቤተ ክርስቲያኒቱም ቅድሚያ ለሀገርና ለወገን ክብር በመስጠት ይህን በተመለከተ በማንኛውም የቤተ ክርስቲያኒቱ ዐውደ ምሕረት ሁሉ አስፈላጊው ትምህርት እንዲሰጥ ወስኗል፡፡

7. በጋምቤላና በቤንች ማጂ ክልል በነዋሪው ሕዝብ መካከል ስለተከሰተው አለመግባባት ጉዳይ ምልዓተ ጉባኤው ተነጋግሮ ለሀገሪቱ ሰላም ለልማትና ለዕድገት ዕንቅፋት የሚሆኑ ጉዳዮች እንዲወገዱ፣ ኅብረተሰቡ በሰላምና በመግባባት እንዲኖር የቅዱስ ሲኖዶስ ምልዓተ ጉባኤ መልእክቱን አስተላልፏል ፡፡

8. ከሀገር ውጭ ከሚገኙ የሃይማኖት አባቶች ጋር ተጀምሮ የነበረው እርቀ ሰላም ተጠናክሮ መቀጠሉ ለቤተ ክርስቲያንም ሆነ ለሀገር የሚበጅ መሆኑ ስለታመነበት አሁንም የቅዱስ ሲኖዶስ ምልዓተ ጉባኤ ስለ ቀጣዩ ሰላም በሰፊው ተነጋግሮ በቤተ ክርስቲያናችን በኩል የሰላሙ ሒደት ተጠናክሮ እንዲቀጠል ጉባኤው ወስኗል፡፡

ቅዱስ ሲኖዶስ ውይይቱን በመቀጠል፤

  • ሃይማኖትንና ቀኖና ቤተ ክርስቲያን ጠብቆ በማስጠበቅ፤

  • በቤተ ክርስቲያኒቱ ማዕከላዊ አስተዳደር አመራር ሰጭነት የተጀመሩት ልዩ ልዩ የልማት ድርጅቶች ለውጤት በቅተው አገልግሎትን እንዲሰጡ ለማስቻል፤

  • በሀገር ውስጥና በውጭው አህጉረ ስብከት ተመድበው በሚሠሩ ብፁዓን ሊቃነ ጳጳሳት አማካይነት የተካሔደውን ሐዋርያዊ ተግባር በመገምገም፤

  • ጧሪ ቀባሪ የሌላቸው አረጋውያንና አረጋውያት የሚጦሩበት፤ አሳዳጊ የሌላቸው ሕፃናት እየተማሩ የሚያድጉበት የምግባረ ሠናይ ተቋማት በየአህጉረ ስብከቱ እንዲቋቋሙ ለማድረግ፤

  • ለሀገራችን ኢትዮጵያና ለቤተ ክርስቲያናችን ሁለንተናዊ ዕድገትና ልማት የሚበጀውን ሁሉ መፈጸም የሚያስችል መመሪያን ሰጥቶ ስብሰባውን በጸሎት አጠናቋል ፡፡

እግዚአብሔር አምላካችን ሕዝባችንን፣ ሀገራችንን ይባርክ፤
ለሀገራችን ለዓለሙ ሁሉ ሰላሙን ይስጥልን፤
አባ ማትያስ ቀዳማዊ ፓትርያርክ
ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኩስም
ወዕጨጌ ዘመንበረ ተክለ ሃይማኖት
ጥቅምት 26 ቀን 2007 ዓ.ም.
አዲስ አበባ፣ ኢትዮጵያ

በ33ኛው ሀገር አቀፍ አጠቃላይ የሰበካ ጉባኤ ማጠቃላያ ላይ በጉባኤው ፍጻሜ የተደረገው ውይይት


በ33ኛው ሀገር አቀፍ አጠቃላይ የሰበካ ጉባኤ ማጠቃላያ ላይ በጉባኤው ፍጻሜ የተደረገውን ውይይት እንድናቀርብ በተደጋጋሚ ብዘት ያላቸው የድህረ ገጻችን ተከታታዮች ጥያቄ በማቅረባቸው እና በዕለቱ የነበረውን ውይይት ሁሉንም ሰምቶ እውነቱን እንዲረዳ በማለት እንደሚከተለው አቅርበናል፡፡

ክፍል 1

ክፍል 2

 

 

የጥቅምት ቅዱስ ሲኖዶስ ምልዓተ ጉባኤ ዛሬ ተጀመረ ፡፡

በየዓመቱ የሚካሔደው የጥቅምት ቅዱስ ሲኖዶስ መደበኛ ምልዓተ ጉባኤ ዛሬ ጥቅምት 12 ቀን 2007 ዓ.ም. በብፁዕ ወቅዱስ አቡነ ማትያስ ቀዳማዊ፣ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኲስም ወእጨጌ ዘመንበረ ተክለ ሃይማኖት የመክፈቻ ቃለ ምዕዳን ተጀመረ ፡፡

የጥቅምት መደበኛ የቅዱስ ሲኖዶስ ምልዓተ ጉባኤ ሀገር አቀፍ የአጠቃላይ መንፈሳዊ የሰበካ ጉባኤን ተከትሎ የሚካሔድ ሲሆን፣ በሀገር አቀፉ ጉባኤ የተወሰኑ ውሳኔዎችንና የአቋም መግለጫዎች በማጽደቅ ጀምሮ በቋሚ ሲኖዶስ ቀደም ብሎ የተያዙ አጀንዳዎችንና በጉባኤው በሚመረጡ አጀንዳ አርቃቂ አባቶች ምክንያት ለቤተ ክርስቲያን ሁለንተናዊ አገልግሎት መሳካት የሚረዱ አጀንዳዎች ተለይተው በመንፈስ ቅዱስ መሪነት የሚካሔድ የአበው ጉባኤ ነው ፡፡ በምልዓተ ጉባኤው መክፈቻ ላይ ቅዱስ ፓትርያርኩ ያቀረቡት ቃለ ምዕዳንና ቡራኬ እንደሚከተለው በጽሑፍና በድምጽ ወምስል ያቀረብን ሲሆን፣ በጉባኤው የሚወሰኑ ውሳኔዎችንም ተከታትለን እንደምናቀርብ ለመግለጽ እንወዳለን ፡፡

 

 

የጥቅምት 2007 ዓ.ም የቅዱስ ሲኖዶስ ምልአተ ጉባኤ የመክፈቻ መልእክት
በስመ አብ ወወልድ ወመንፈስ ቅዱስ አሐዱ አምላክ አሜን!!

ብፁዓን ሊቃነ ጳጳሳት የቅዱስ ሲኖዶስ አባላት!

ምእመናንን በንጹሕ ደሙ የዋጀ ጌታችን አምላካችንና መድኃኒታችን ኢየሱስ ክርስቶስ ቤተ ክርስቲያንን በቅዱስ መንፈሱ መሪነት እየጠበቀ ከዚህ ጊዜ ስላደረሰን ክብርና ምስጋና ለእርሱ እናቀርባለን ፡፡

እንደዚሁም ሁላችንን የቅዱስ ሲኖዶስ አባላት ከየሀገረ ስብከታችን በረድኤት ስቦ በሀብት አቅርቦ በዚህ ሐዋርያዊና ዓመታዊ የቅዱስ ሲኖዶስ ጉባኤ ተገናኝተን በእግዚአብሔር ስለተሰጠን ዓቢይ ተልእኮ እንድንመካከር ስለሰበሰበን ስሙ የተመሰገነ ይሁን ፡፡

"ወመጺኦ ውእቱ መንፈሰ ጽድቅ ይመርሐክሙ ኀበ ከሉ ፍኖተ ጽድቅ፤ ያ የእውነት መንፈስ በመጣ ጊዜ ወደ እውነት ሁሉ ይመራችኋል፤" (ዮሐ. 16:3)

 በተጨማሪ ያንብቡ …

የሰንበት ት/ቤቶች ማደራጃ መምሪያ የሥርዓተ ትምህርት ማስተማሪያ መጽሐፍ አሳትሞ በቅዱስ ፓትርያርኩ አስመረቀ

እንደሚታወቀው በኢ/ኦ/ተ/ቤ/ክ ክርስቲያን የሰ/ት/ቤቶች ማደራጃ መምሪያ ከተቋቋመ በርካታ ዓመታትን አሳልፏል፡፡ ይሁን እንጂ እስከ አሁን ድረስ የሰ/ት/ቤት ተማሪዎች በግል በተዘጋጀ ጽሑፍና አልፎ አልፎ በግል በሚታተሙ መጽሔቶች እየተማሩ አሁን ላሉበት ደረጃ ደርሰዋል፡፡ ይህ ዓይነቱ ተመሳሳይ ያልሆነ ግንዛቤ እያደር የዕውቀትና የአመለካከት ልዩነት ከመፍጠሩም ባሻገር ለልዩ ልዩ እንግዳ ትምህርቶች በር የከፈተ በመሆኑ የሰ/ት/ቤቶች ማደራጃ መምሪያ አንድ ዓይነት ወይም ወጥ የሆነ ሥርዓተ ትመህርት በሰ/ት/ቤት ተማሪዎች ለመዘርጋት በማቀድ የማስተማሪያ መጽሐፍ ዘመናትን በመዋጀት የሚዘመር መዝሙረ ማኅሌት በማሳተም ባለፈው ቅዳሜ ጥቅምት 8 ቀን 2007 ዓ.ም በጠቅላይ ቤተ ክህነት አዳራሽ ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት ብፁዓን አበው ሊቃነ ጳጳሳት የጠቅላይ ቤተ ክህነት የየመምሪያው ኃላፊዎች፣ የአዲስ አበባ አድባራት እና ገዳማት አስተዳዳሪዎች የ51 አህጉረ ስብከት ሥራ አስኪያጆች እንዲሁም ጥሪ የተደረገላቸው እንግዶች በተገኙበት በታላቅ ድምቀት አስመርቋል፡፡ ብዙዎቹ አባቶች እና ሥራአስኪያጅ እንደገለጹት ከሆነ ለዘመናት ስንጠይቀው የነበረው ጥያቄ አሁን ተመልሷል ማለት ይቻላል በማለት አድናቆታቸውን ገልጸዋል፡፡

ይህ በእንዲህ እንዳለ የመምሪያው ዋና ኃላፊ መ/ር ዕንቈባሕርይ ተከስተ እንደገለጹት የእነዚህ መጻሕፍት ሥራ በዚህ የሚያበቃ ሳይሆን በየቋንቋው የመተርጎም ስራም ተያይዞ ይቀጥላል በማለት ወደ ኦሮምኛ እና ወደ ትግርኛ የመተርጎሙ ሥራ በቅርብ ቀን እንደሚጀምር እና ዝግጅቱ ሁሉ ተጠናቅቆ እንዳለቀም ገልጸዋል፡፡ በዚሁ አጋጣሚ በቅድስት ቤተ ክርስቲያናችን ያደጉ እና በዚህ የትርጉም ስራ ላይ ለመሳተፍ እንዲሁም ሕያው የሆነ ታሪክ ለትውልድ ሰርቶ ለማለፍ ፍላጎት ያላቸው ወጣት ምሁራን ወደ መምሪያችን ብቅ ብለው እንዲረዱን ጥርዬን አስተላልፋለሁም ብለዋል፡፡ መጻሕፍቱም ከሰኞ ጥቅምት 10 ቀን 2007 ዓ.ም ጀምሮ በማደራጃ መምሪያው ሱቅ ውስጥ መሸጥ እንደሚጀምር ገልጸዋል፡፡

ዓመታዊ የሰበካ አጠቃላይ መንፈሳዊ ጉባኤ ዛሬ ተጀመረ ፡፡

በኢትዮጵያ ኦርቶዶክስ ተዋሕዶ ቤተ ክርስቲያን በየዓመቱ የሚካሔደው ዓመታዊ የሰበካ አጠቃላይ መንፈሳዊ ጉባኤ ዛሬ ጥቅምት 5 ቀን 2007 ዓ.ም. ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት፣ ብፁዕ አቡነ ማቴዎስ የጠቅላይ ቤተ ክህነት ዋና ሥራ አስኪያጅና የወላይታ ኮንታ ዳውሮ አህጉረ ስብከት ሊቀ ጳጳስ፣ ብፁዓን አበው ሊቃነ ጳጳሳት፣ የጠቅላይ ቤተ ክህነት የየመምሪያ ኃላፊዎች፣ የሁሉም አህጉረ ስብከት ሥራ አስኪያጆችና ልዑካን፣ የአዲስ አበባ ገዳማትና አድባራት አስተዳዳሪዎች እንዲሁም ጥሪ የተደረገላቸው እንግዶች በተገኙበት ተጀመረ ፡፡

የመንበረ ፓትርያርክ ቅድስተ ቅዱሳን ማርያም ገዳም ካህናት ጸሎተ ወንጌል በማድረስ የተጀመረ ሲሆን፤ የቅዱስ ዑራኤል ቤተ ክርስቲያን ሰንበት ት/ቤት መዘምራን ያሬዳዊ መዝሙር በማቅረብ የጉባኤውን ጅማሬ አብስረዋል ፡፡ በመቀጠል ብፁዕ ጠቅላይ ሥራ አስኪያጁ የእንኳን ደኅና መጣችሁ ንግግር ካደረጉ በኋላ ብፁዕ ወቅዱስ ፓትርያርኩ ቡራኬና ቃለ ምዕዳን እንዲሰጡ በጋበዟቸው መሠረት ሰፊ አባታዊ ቃለ ምዕዳን ሰጥተዋል ፡፡

ብፁዕ ወቅዱስ ፓትርያርኩ ባስተላለፉት ቃለ ምዕዳን አዲሱን ዘመን ሥራ የምንሠራበት፣ የተጣመመ የምናቀናበት፣ የሚጎለንን የምንሞላበት ዘመን እንዲሆን ከተመኙ በኋላ ከቅርብ ዘመናት ወዲህ እየታየ ያለው የምእመናን ቁጥርን መቀነስ እጅግ በጣም አሳዛኝ በመሆኑ ቤተ ክርስቲያናችን ለስብከተ ወንጌል ተልዕኮ ከፍተኛ ትኩረትና ብርቱ ጥረት ማድረግ እንደሚጠበቅ ገልፀዋል ፡፡

መልካም አስተዳደርን በተመለከተ በቤተ ክርስቲያናችን በምልዓት ሊሰፍን የሚገባ መሆኑንና በዚህ ምክንያትም ቤተ ክርስቲያናችን የነበራትን ጥንተ ልዕልናና ክብር አስጠብቃ መቀጠል አልቻለችም ፡፡ ስለዚህ የመልካምነት ሁሉ መገኛ የሆነችውቤተ ክርስቲያናችን መልካም አስተዳደርን ሙሉ በሙሉ በማስፈን ያጣናቸውን ጥንተ ታሪኮቻችንን በሙሉ መመለስ ይኖርብናል ፡፡

በሀገራችን ብሎም በዓለማችን ለሕዝባችንና ለሀገራችን ከፍተኛ ውርደት የሆነው የሕገወጥ የሰዎች ዝውውርን አስከፊነት በተመለከተ ከስብከተ ወንጌል ጎን ለጎን ሁሉም ሊቃውንት አበክረው እንዲያስተምሩ አደራ ጭምር አስተላልፈዋል ፡፡

በመጨረሻም በየወቅቱ እየተነሡ የሰው ልጅን በመቅሰፍ ላይ የሚገኙ በሽታዎች እግዚአብሔር በድንቅ ጥበቡ ከዓለማችን እንዲያስወግድልንና ወደሀገራችንም እንዳይገቡ አጥር ቅጥር ሁኖ እንዲጠብቀን በሁሉም ዘንድ ከገጠር እስከ ከተማ ጸሎተ ምኅላ እንዲደረግ መልእክት በማስተላለፍ ቃለ ምዕዳናቸውን አጠናቀዋል ፡፡

ጉባኤው በብፁዕ ጠቅላይ ሥራ አስኪያጅ ሪፖርት አቅራቢነት የተጀመረ ሲሆን ሁሉም አህጉረ ስብከት በተያዘላቸው መርሐ ግብር መሠረት ሪፖርታቸውን እያቀረቡ ጉባኤው በመካሔድ ላይ ይገኛል ፡፡

የተከበራችሁ አንባቢዎች የጉባኤው መክፈቻ መርሐ ግብር በድምፅ ወምስል፣ የብፁዕ ጠቅላይ ሥራ አስኪያጁ አጠቃላይ ሪፖርት ያቀረብን ሲሆን የጉባኤውን መንፈስ እየተከታተልን የምናቀርብ መሆናችንን እንገልጻለን ፡፡

 

ብፁዕ ወቅዱስ አቡነ ማትያስ ፓትርያርክ ርእሰ ሊቃነ ጳጳሳት ዘኢትዮጵያ ሊቀጳጳስ ዘአክሱም ወእጨጌ ዘመንበረ ተክለሃይማኖት"የቤተክርስቲያን አስተዳደራዊ አስተሳሰብ ማበልፀግ" በሚል ርዕስ ለጠቅላይ ቤተክህነት ከፍተኛ የሥራ ኃላፊዎች እና ለአዲስ አበባ አበባ ሀገረ ስብከት ገዳማትና አድባራት አስተዳዳሪዎች ያቀረቡት ትምህርታዊ ቃለ ምዕዳን

በስመ አብ ወወልደ ወመንፈስ ቅዱስ አሐዱ አምላክ አሜን!!

"ምክር ሠናይት ለኩሉ ዘይገብራ" ለሚፈጽማት ሰው መመካከር መልካም ናት

የተከበራችሁ የመንፈስ ቅዱስ ልጆቻችን

የአዲስ አበባ ገዳማትና አድባራት አስተዳዳሪዎችና ጸሐፊዎች

  • በአዲሱ ዓመት በማስመልከት በአሠራራችን፣ በምእመናን አያያዛችንና ተመሳሳይ በሆኑ ጉዳዮች ላይ መወያየት አስፈላጊ ነው ብለን በማሰባችን እንድንገናኝ ሁኗል።

  • ውይይት መልካም ነው። የእግዚአብሔር ቃልም የሚያስተምረን መመካከር ፤ መረዳዳትና መወያየት እጅግ አስፈላጊ እንደ ሆን ነው፡፡ ምክንያቱም ውይይት ግንዛቤን ያሰፋል፡ ለአንድ ዓላማ ያነሳሳል፤ ፍቅርና ሰላም ያሰፍናል፡ አንድ አመለካከት ይፈጥራል፣ መንገድ የሳተም ይመልሳል፣ የወደፊት አቅጣጫም ያስተካክላል።

  • ዛሬ የምንወያይበት ርእሰ ጉዳይ የቤተክርስቲያን አስተዳደራዊ አስተሳሰብ ለማበልፀግ ነው።

የቤተክርስቲያን አስተዳደራዊ አስተሳሰብ ማበልፀግ ለምን እንፈልጋለን ወይም ለምን እንዲኖር እንገደዳለን? ብንል?

ዘመን ይለወጣል፤ በዘመን ውስጥ የሚኖር ሰውም አስተሳሰቡ እንደየሁኔታው ይለወጣል። ይህ ለውጥ በአዎንታዊ ጎኑ እድገት ሲሆን በአሉታዊ ጎኑ ደግሞ ውድቀት ሊያስከትል ይችላል። ዘመን በመለወጡ እነዚህ ሁለት ነገሮች ሁልጊዜ አሉ። እኛም ለለውጡ አስተዋፅኦ አለን።

 በተጨማሪ ያንብቡ …

ብፁዕ ወቅዱስ ፓትርያርኩ ከአዲስ አበባ ሀገረ ስብከት የሥራ ኃላፊዎችና ከገዳማትና አድባራት አስተዳዳሪዎች ጋር ምክክር አካሔዱ

ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት፣ ብፁዓን አበው ሊቃነ ጳጳሳት፣ የአዲስ አበባ ሀገረ ስብከት የሥራ ኃላፊዎች፣ የክፍለ ከተማ ቤተ ክህነት የሥራ ኃላፊዎች፣ የአዲስ አበባ ገዳማትና አድባራት አስተዳዳሪዎችና ጸሐፊዎች በተገኙበት በአዲስ አበባ ሀገረ ስብከት አዳራሽ መስከረም 27 ቀን 2007 ዓ.ም. ከፍተኛ የምክክር ጉባኤ አካሔዱ ፡፡

መርሐ ግብሩ በቅዱስ ፓትርያርኩ ጸሎተ ቡራኬ ከተጀመረ በኋላ ለዕለቱ የተዘጋጀው ትምህርታዊ የመወያያ መልእክት ‹‹የቤተክርስቲያን የአስተዳደር አሠራርን ማበልጸግ›› በሚል መሪ ርእሰ ጉዳይ አንስተው ሰፊ ማብራሪያና ትምህርት፣ ምክርና ምእዳን በመስጠት የተሰብሳቢውን ልብ በሚነካ አኳኋን መልእክታቸውን አስተላልፏል ፡፡

ቅዱስ ፓትርያርኩ በመልእክታቸው ዘመኑ ያልዋጀና ብልሹ አሠራርን ስለማስተካከል በተመለከተ፣ ዘረኝነትና አድሎአዊ አሠራርን ስለማስወገድ በተመለከተ፣ ሙስናን ስለመቃወምና ሕገ ወጥ ማኅበራትን ሥርዓት ስለማስያዝ በተመለከተ ሰፊ ገለፃ በማድረግ መድረኩን ለውይይት ክፍት አድርገዋል፡፡

ጉባኤውም በቅዱስ ፓትርያርኩ ትምህርታዊ መልእክት ላይ ጥልቅ የሆነ ምክክር ካካሔደ በኋላ የጋራ የአቋም መግለጫ በማውጣት በከፍተኛ አድናቆት ተጠናቅቋል፡፡

የተከበራችሁ አንባቢዎቻችን ከዚህ ቀጥሎ ቅዱስ ፓትርያርኩ ያቀረቡትን መልእክትና የጉባኤው የአቋም መግለጫ በተመለከተ በተከታታይ የምናቀርብ መሆናችንን እንገልፃለን ፡፡በዕለቱ የተደረገው ወይይትና የአቋም መግለጫ ድምፅና ምስል ከዘህ ቀጥልን እናቀርባለን፡፡

ማስታወሻ፡-

 የህን ድምፅና ምስል በከፊልም ሆነ በሙሉ በኢትዮጵያ ኦርቶዶክስ ተዋሕዶ ቤተክርስቲያን መንበረ ፓትርያርክ ጠቅላይ ጽ/ቤት የሰንበት ትምህርት ቤቶች ማደራጃ መምሪያ ፍቃድ ውጪ ማስተለፍ በሕግ ያስጠይቃል !!!

ክፍለ 1 ክፍለ 2

ክፍለ 3 ክፍለ 4
ክፍለ 5  
 

 

 

 

በየዓመቱ የሚከበረው የመስቀል ደመራ በዓል ዘንድሮም በታላቅ ድምቀት ተከበረ፡፡

በኢትዮጵያ ኦርቶዶክስ ተዋሕዶ ቤተ ክርስቲያን ከሚከበሩት ታላላቅ ሃይማኖታዊ ብሔራውያን በዓላት ውስጥ ትልቅ መንፈሳዊና ሃገራዊ ፋይዳ ገንዘብ ያደረገውን የመስቀል ደመራ በዓላችን ዘንድሮም በታላቅ መንፈሳዊ ሥነ ሥርዓት በመስቀል አደባባይ በብፁዕ ወቅዱስ አቡነ ማትያስ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳሳት ዘአክሱም ወእጨጌ ዘመንበረ ተክለሃይማኖት፣ ብፁዓን አበው ሊቃነ ጳጳሳት፣ የአዲስ አበባ ገዳማትና አድባራት አስተዳዳሪዎች፣ ጥንግ ድርብ የለበሱ ሊቃውንተ ቤተ ክርስቲያን፣ ካህናትና ምዕመናን እንዲሁም የሰንበት ትምህርት ቤት ወጣቶች፣ የመንግስት ባለስልጣናት፣ አምባሳደሮችና ጥሪ የተደረገላቸው እንግዶች በተገኙበት ተከብሮል፡፡

በዕለቱ የተቀረጸውን ቪድዮ ከዚህ በመቀጠል ይመልከቱ፡፡

 

ክፍል 1  

ክፍል 2

 

_DSC7894 _DSC7902 _DSC7913 _DSC7920 _DSC8002 _DSC8019 _DSC8020 _DSC8032 _DSC8056 _DSC8085 _DSC8163 _DSC8191 _DSC8192 _DSC8219 _DSC8243 DSC7831

 

ቅዱስ ፓትርያርኩ የመቄዶንያ አረጋውያንና ሕሙማን ጎበኙ

በቤተ ክርስቲያኗ ስም መቶ ሺህ ብር ለተረጂዎች ድጋፍ አድርገዋል

ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት መስከረም 17 ቀን 2007 ዓ.ም ከጥዋቱ በሦስት ሰዓት አረጋውያንና የአእምሮ ሕሙማን ወገኖቻችን ከሚረዱበት በመቄዶንያ አረጋውያንና የአእምሮ ሕሙማን መርጃ ማዕከል ዘንድ በመገኘት ጉብኝትና በቤተ ክርስቲያኒቷ ስም ለመረጃ ማእከሉ ድጋፍ አድርገዋል፡፡

በጉብኝቱ ወቅት የመቄዶንያ መርጃ ማዕከል ቦርድ ሰብሳቢ ክቡር ዶ/ር ፀጋዬ በርሄ እንደገለፁት መርጃ ማዕከሉ በአንድ ወጣት ኢትዮጵያዊ /አቶ ቢንያም/ አማካኝነት የተጀመረ መሆኑን ገልጸው አሁን ግን ከስድስት መቶ አረጋውያንና የአእምሮ ሕሙማን አገልግሎት በማግኘት ላይ እንደሚገኙ በስፋት ገልጸዋል፡፡ የመርጃ መዕከሉ መሥራችና ዋና ሥራ አስኪያጅ የሆነው ወጣት ቢንያም በበኩሉም ይህን መርጃ ማዕከል በጥቂት ሰዎች ጀምሮ አሁን በሦስት ማዕከላት ከስድስት መቶ ተገልጋዮች በላይ መኖራቸውን ገልጸው እነዚህ ወገኖች የሚረዱት በሁሉም ኢትዮጵያውያን ስለሆነ ሁሉም በጎ አድራጊ ወገኖችን ምስጋና ካቀረቡ በኋላ በተለይ የኢትዮጵያ ኦርቶዶክስ ተዋሕዶ ቤተ ክርስቲያን ግን ለምታደርግላቸው ሁለገብ ድጋፍ ምስጋናቸውን ከፍ ያለ መሆኑ ገልጸዋል፡፡

በመጨረሻም ብፁዕ ወቅዱስ አቡነ ማትያስ በቦታው ለተገኙ አረጋውያንና ለመረጃ ማዕከሉ ሠራተኞች ሰፊ አባታዊ ቡራኬና ቃለ ምዕዳን ሰጥተዋል፡፡ በቃለ ምዕዳናቸውም "ተርቤ አብልታችሁኛልና፤ ተጠምቼ አጠጥታችሁኛልና፣ ታርዤ አልብሳችኁኛልና" የሚል ቃለ ወንጌል መሠረት አድርገው ለአገልጋዮችና ለተገልጋዮች የማጽናኛና የበረከት ትምህርት ካስተማሩ በኋላ በመርጃ ማዕከሉ ለሚገኙ አረጋውያንና የአእምሮ ሕሙማን መርጃ የሚሆን በኢትዮጵያ ኦርቶዶክስ ተዋሕዶ ስም መቶ ሺህ ብር በመስጠት ማዕከሉን አበረታቷል፡፡ የተከበራችሁ አንባቢዎች በወቅቱ የተደረገውን ጉብኝት በተመለከተ የሚያሳይ ቪድዮ እንድትመለከቱ አቅርበናል፡፡

More Articles...

የፎንት ልክ መቀየሪያ